Beibel ta un buki konsiderá pa gran mayoria di hende na mundu komo un buki inspirá i sagrado. N’e mesun tempu e buki mihó bendí den tur tempu. E ta e buki ku ta tradusí den kasi tur lenga i tin miónes di e buki aki den tur skinanan di mundu. E la pasa dor di tur tempestat i gueranan, durante siglonan i a sali viktorioso, kual ta hasi posibel pa nos por tin é awe. Pero e realidat ta ku poko ta esnan ku berdaderamente ta benefisiá di e buki aki. Kisas pa falta di interes, òf pa motibu di prehuisio keriendo ku e beibel ta solamente pa pastornan i sabínan. Pero si wak den mundu tin alrededor di 33.000 denominashon, pero kada unu ku nan propio bista, nan propio kaminda, siendo ku beibel ta papia ku tin un kaminda, un bèrdat i un bida. P’esei entendimentu di e palabra di Dios ta bira sumamente importante, si no siguramente hende lo wòrdu engañá, pasó historia ta konfirmá na nos esaki, mustrando ku hopi iglesianan i siñadonan falsu a lanta i gaña míles di hende. Pa sigui lesa primi riba e pintura ariba.
